Pecha os ollos. Sente como as raiolas do sol che quentan a cara. É o sol do verán, da primavera ou ese que fai chegar a súa calor neses días de inverno nos que se ergue fachendoso para reclamar o seu espazo no ceo despexado? Non importa, só goza desa sensación pracenteira. Escoita agora. O río Ulla baixa cantareiro cara o mar, arrolando ao salmón no berce que as súas augas preparan para o monarca fluvial. Ou é o Liñares? Non importa, só goza escoitando. Reláxate co son. Agora, cheira e sente o sabor na boca. Non ule ao salitre. É doce; é terra bañada, é frescura, é…. verde. Abre os ollos e completa a experiencia. Mira o cadro que os ríos pintaron na Estrada. Aquí non hai mar, pero abofé que hai praia.

Cando comeza o bo tempo, a natureza chama. Apetece o paseo, o descanso ao aire libre, o esparexemento, o goce cos cinco sentidos. As terras do Concello da Estrada están bañadas por dous grandes ríos que desembocan na Ría de Arousa: o Ulla e o Umia. O primeiro percorre a zona norte do concello, bebendo das augas que lle levan o Liñares, o Curantes ou o Vea, e que axudan a convertelo nun dos ríos máis caudalosos de Galicia. O Umia rega o sur, atravesando parroquias como Liripio, Ribela, Codeseda, Arca ou Souto. Os dous alíanse para facer da Estrada un concello rico para a pesca, con numerosos cotos, entre eles os catro (Ximonde, Sinde, Pontevea e Couso) que atraen aos moitos pescadores que ansían levar o salmón á súa sacadeira.