Chama a atención o dinamismo da música en Galicia, un sector da cultura emerxente que, ademais, conecta coa poboación nova. Hai unha eclosión de cantantes e grupos, que se proxectan máis aló dos escenarios e festivais galegos. A eles hai que engadir as foliadas, seráns e os  cantos de taberna, que se celebran por todo o país.  A música de raíz, a que bebe na tradición, espállase cada vez con máis pulo pola nosa xeografía.

Seguramente, unha das razóns que o explican son as escolas de música. Promovidas polos concellos ou asociacións, fomentan a nosa música a todas as idades.  Sorprende que o alumnado destas escolas populares sexa dun abano que vai dende a rapazada miúda aos avós. Son a confirmación de que calquera idade é boa para aprender música.

A escola de Chantada, a Asociación Cultural Casa da Música de Chantada, cumpre quince anos. Ao abeiro do concello, instrúe no goce da música a centos e centos de mozos e non tan mozas da vila. “Cando comezamos había 17 matrículas e agora somos a escola de música de Galicia, das que optan ás subvencións da Xunta, con máis alumnado, con 730 matrículas neste  curso 2025/2026″, apunta Manuel Sánchez, director da Casa da Música.  “Ademais, somos a escola máis barata de Galicia, facendo equilibrios económicos: o alumnado paga 25 euros ao mes por catro clases á semana”.

A escola

O equipo directivo presidido por Pablo Dafonte ten como director da escola a Manuel Sánchez e a Óscar Rodríguez como director da sección tradicional. É, pois, en realidade, unha asociación xestionada polos músicos que traballan nela, cunha plantilla de dezaseis traballadores, tres deles profesores que comezaron no 2010 como alumnos. Porque moitos que empezan nela continúan formándose e chegan a facer da música a súa forma de vida.

A escola está organizada en tres  liñas de traballo: a sección clásica, para aprender calquera instrumento pensado para tocar nunha banda de música (instrumentos de vento, madeira, vento-metal e percusión), a sección moderna (guitarra, baixo eléctrica, piano ou batería) para xente interesada en tocar rock ou música moderna, e a sección tradicional (gaita, tamboril, pandeireta). Hai tamén ballet e danza moderna, ademais do baile tradicional, que aumenta cada curso: foise recuperando desde fai cinco ou seis anos e agora son case noventa bailadoras e bailadores, de entre dez e dezaoito anos .

Materias

Antes só se podía aprender o que mandaban, o que se necesitaba, non o que quería cadaquén. Agora hai unha gran variedade de aprendizaxes posibles.  A Casa da Música de Chantada ofrece para este curso académico clases colectivas de ballet, baile galego, banda infantil, batukada, combo, danza moderna, improvisación, linguaxe musical, música e movemento e pandeireta. As formacións individuais son dos seguintes instrumentos:  acordeón, baixo eléctrico, batería, canto, clarinete, frauta, gaita, guitarra, guitarra eléctrica, percusión, piano, saxofón, trombón, trompa, trompeta, tuba, ukelele e violín.

No proceso de aprendizaxe son necesarias moitas horas á semana, tamén de práctica na casa, que nun momento dado dá un paso adiante coa formación dos combos. Búscase non só a formación individual senón tamén que se adapten a participar nunha agrupación creada na propia escola e en cada curso. Así, se hai catro alumnos cun nivel semellante tocando a batería, a guitarra, o baixo eléctrico e cantando, o profesorado proponlles montar unha canción e ensaiala en grupo, que se estrea nos concertos solidarios ou na fin do curso. Por razóns de traballo, estudos, etc. os combos non teñen, en xeral, continuidade pero son unha estimulante ferramenta de aprendizaxe.

Mesmo se forma unha banda de música da escola coa incorporación dos diferentes instrumentos (de vento-metal e  vento-madeira, saxofón, trompeta, clarinete, frauta…) e de idades diversas, dirixida por Iván Quintana e sen vocación de continuidade máis alá de cada curso.