O 12 de agosto de 2026, Lalín será punto clave para observar a primeira eclipse solar total do século, un fenómeno histórico ao non rexistrarse un similar na Península dende 1912, evento que aproveitará para potenciar o chamado astroturismo, con actividades que terán como escenario principal o coñecido como Altar do Sol na parroquia de Alperiz. No contorno deste monumento megalítico, que os habitantes da prehistoria construíron orientado en liña cos equinoccios de inverno e verán, instalaranse pantallas xigantes para a súa retransmisión simultánea coas imaxes que tamén se filmarán dende outro dos puntos claves para ollar este fenómeno astronómico, a Praia das Catedrais de Ribadeo, co relato científico do profesor e director emérito do Observatorio de Santiago, Xosé Anxo Docobo. Ambas as dúas zonas van destacar como destino de astroturismo nesa data, para o que contan co apoio da Axencia de Turismo de Galicia e a Fundación Starlight, que ten no concello de Lalín un dos puntos de destino de referencia en Galicia.

En Alperiz, haberá un aparcamento para o público que queira asistir en directo a este excepcional fenómeno astronómico, que na súa fase de eclipse total comezara ás 20,30 horas e terá unha duración duns 20 segundos en Lalín e 1,45 minutos en Ribadeo. Nun recinto con palco habilitado para o efecto, en Alperiz ofreceranse actividades divulgativas e actuacións musicais que continuarán ata despois da media noite, se as condicións meteorolóxicas o permiten, coa observación da choiva das estrelas Perseidas, que tamén asomarán no firmamento nesa xornada de verán. Quen teña interese tamén poderá seguilo polas retransmisións das cadeas de televisión e canles da internet, que dispoñerán as cámaras precisas en Lalín e Ribadeo.